পৃষ্ঠা:জিলিকনি-আনন্দচন্দ্ৰ আগৰৱালা.pdf/৬০

এই পৃষ্ঠাটোৰ বৈধকৰণ হৈছে

( ৫২ )

গুণ নহলে নো ৰূপে কি কাম সাধিব,
স্বভাৱ নহলে ভাল কুলে কি কৰিব?
কাৰ্য্যসিদ্ধি নহলে নো বিদ্যা কি কাৰণ
ভোগ নকৰিলে ধন মিছা উপাৰ্জ্জন।

ফুলিলে এজোপা মাথোঁ সুফুল হাবিত,
সুগন্ধে গোটেই হাবি কৰে আমোদিত;
সিৰূপে সুপুত্ৰ যদি এটি জন্ম ধৰে,
গোটেই বংশটো তাৰ গুণতে পোহৰে।

এটি মাত্ৰ গুণৱন্ত পুত্ৰ যদি ৰয়,
সিও ভাল শত মূৰ্খ একোৱে নহয়;
এক চন্দ্ৰে জগতৰ অন্ধকাৰ হৰে,
অসংখ্যাত তৰাবোৰে কিবা গুণ ধৰে?

হলেও ৰূপহ ডেকা উত্তম কুলৰ,
কদাপি নাপায় শোভা বিদ্যাহীন নৰ;
যেনুৱা পলাশ ফুল দেখোঁতে সুন্দৰ,
গন্ধহীন বুলি কেৱেঁ নকৰে আদৰ।