এই পৃষ্ঠাটোৰ বৈধকৰণ হৈছে
আমাৰ গাওঁ।
শুৱনি আমাৰ গাওঁখন অতি,
শুৱনি গছেৰে ভৰা;
ডাল ভৰি ভৰি ফলফুল লাগে,
কত পাওঁ তল-সৰা।
শুৱনি আমাৰ ধাননি পথাৰ,
ধানেৰে উপচি পৰে;
শুৱনি নদীৰ পানী-ভৰা ঘাট,
মুদৈয়ে বেপাৰ কৰে।
চালত কোমোৰা, লাও, জিকা, ভোল,
ভঁৰালত জহা ধান,
গোহালিত গৰু, পুখুৰীত মাছ,
বাৰীত তামোলপান।
গছৰ ডালত শুৱনি চৰায়ে,
শুৱলা সঙ্গীত গায়;
শাকনিত শাক, ফুলনিত ফুল,
দেখিলে হিয়া জুৰায়।
ঘৰে ঘৰে ৰং ধেমালিৰ হাট,
ঘৰে ঘৰে হাঁহি-মুখ,
ঘৰে ঘৰে ভাল চেনেহা-চেনেহী,
ঘৰে ঘৰে দেখোঁ সুখ।