এই পৃষ্ঠাটোৰ বৈধকৰণ হৈছে
( ২৭ )
ৰূপৰ পোহাৰ মেলা,
আকাশত কৰা খেলা,
কোন তুমি কোৱাঁ হেৰাঁ স্বৰগবাসিনী,
কাৰ প্ৰভাৱত কৰা জোনাক যামিনী?
মণিত মাদলি যেন,
সভাত কুঁৱৰী হেন,
তৰাৰ মাজত বহি,
মিচিকি মিচিকি হাঁহি,
ৰূপালী পোহৰ বাকি দিছা জগতত,
অশেষ তৰাৰ বাণী তুমি আকাশত।
দেখি তযু মধু-হাঁহি
পুখুৰীত ভেঁট-পাহি,
সাজি-পাৰি উলাহত,
তোমাৰেহে মৰমত,
একেৰাহে চাই থাকে তোমাকে ধিয়াই,
তুমি দিয়া প্ৰতিবিম্ব পানীত পেলাই।
অকণি জোনাক লই,
জোনাকী বিতৎ হই,
নিজক কুৰূপ ভাবি,
উৰি উৰি আহি নামি,
গছৰ ছায়াত গই জাকেৰে সোমাই,
আন্ধাৰত ৰিণি ৰিণি পোহৰ বিলায়
